Pragma - Félag verkfræðinema við Háskólann í Reykjavík

Pragma er félag verkfræðinema við Háskólann í Reykjavík. Félagið var stofnað 24. febrúar 2006. Pragma er hagsmunafélag nemenda sem að leggja stund á verkfræði við Háskólann í Reykjavík. Félagið mun sjá til þess að skólaárið sé með eindæmum hressandi og skemmtilegt.

Pragma mun vinna að því að halda öflugum tengslum við atvinnulífið. Til að stuðla að þessum tengslum munum við innan félagsins starfrækja Verkfræðiskólann. Verkfræðiskólinn mun leitast við að fá fyrirtæki til að vinna náið með nemendum að ýmsum verkefnum sem að þeir kunna að taka sér fyrir hendur. Einnig mun Verkfræðiskólinn fá aðila úr atvinnulífinu til að halda spennandi fyrirlestra eða námskeið,

Það er alveg nauðsynlegt að hafa gott félagslíf þegar hinn venjulegi dagur fer allur í skólabækurnar og því mun félag verkfræðinema sjá til þess að nemendur fái sinn skerf af skemmtilegheitum. Félagið mun standa fyrir vísindaferðum og skemmtunum ásamt ýmsu öðru sem hvílir hugann frá náminu og eflir þar af leiðandi námsþróttinn.

Allir nemendur í verkfræði við Háskólann í Reykjavík gerast sjálfkrafa félagsmenn en þeir sem greiða félagsgjöldin njóta sérstakra fríðinda.

Stór hluti háskólanáms er að kynnast nýju fólki og mynda tengsl við atvinnulífið. Þess vegna viljum við hvetja alla til að greiða félagsgjöldin og taka virkan þátt í félagslífinu.

Lög Pragma má lesa hér

Verkfræðiskólinn

Hlutverk verkfræðiskólans er að efla tengsl verkfræðideildar Háskólans í Reykjavík við atvinnulífið. Skylda hans er að stofna til umræðu um verkfræðileg málefni, stuðla að verkfræðilegri þekkingu og móta tengsl við fyrirtæki og stofnanir sem starfa á vettvangi sem tengist námi verkfræðinema.

Verkfræðiskólinn skipuleggur fyrirlestra sem miða að því að tengja námið við atvinnulífið og gefa innsýn í hvað bíður að námi loknu.

Einnig sér verkfræðiskólinn um að halda virðisaukandi námskeið fyrir félagsmenn Pragma utan skólatíma. Námskeiðin eru af ýmsum toga og gagnast bæði í námi og starfi.

Verkfræðiskólinn mun leitast við að fá fyrirtæki til að vinna náið með nemendum að hinum ýmsu verkefnum sem þeir kunna að taka sér fyrir hendur.

Deildir verkfræðinnar:

Fjármálaverkfræði

Fjármálaverkfræði er spennandi grein sem hefur vaxið ört innan verkfræðinnar í samræmi við stóraukið flækjustig fjármálamarkaða og fjármálaafurða. Markmið námsins er að mennta lykilstarfsmenn fyrirtækja þar sem djúpur skilningur á fjármálamörkuðum skiptir miklu máli. Í greininni er fengist við tölulega greiningu, tölfræði, aðgerðagreiningu, hermun og bestun, auk hefðbundinna fjármálagreina og viðskiptalögfræði, en fjármálaverkfræðingar beita verkfræðilegum aðferðum til þess að greina, herma og besta fjármálatengd verkefni.

Hóp blogg 3. árs fjármálaverkfræðinema: www.fjarmal.com 

Heilbrigðisverkfræði

Heilbrigðisverkfræði er nýlegt svið innan verkfræðinnar og það sem hvað mestur vöxtur hefur verið í erlendis á undanförnum árum. Í heilbrigðisverkfræði er fengist við verkefni sem tengjast lækningum, s.s. þróun gerviliða og gervilíffæra, einnig verkefni sem tengjast upplýsingakerfi mannslíkamans, rekstur heilbrigðiskerfa og margvísleg önnur verkefni. Greinin er þverfaglegt fræðisvið sem samþættir verkfræði við grunnþekkingu á mannslíkamanum og skilning á því hvernig hann virkar í heilbrigðu ástandi, í veikindaástandi og við slys.

Kjarni námsins er sá sami og í almennri verkfræði, þ.e. eðlisfræði, stærðfræði, verkfræðilegar undirstöðugreinar, hönnun og rekstur. Við þetta bætist svo lífeðlisfræði, líffærafræði, mælitækni, stoðtækni, myndgerð og heilbrigðisgreinar, auk þess sem rík áhersla er lögð á tölvunotkun. Hópvinna er mikilvægur þáttur í náminu, enda starfa heilbrigðisverkfræðingar iðulega í hópum með læknum, sjúklingum, framleiðslufyrirtækjum og markaðsfólki, og eru gjarnan í hlutverki þess sem brúar bilið á milli þessara aðila. Heilbrigðisverkfræðingar hljóta í náminu m.a. sérstaka þjálfun til þess að geta fært þverfaglega þekkingu úr grunnrannsóknum inn í sjúkrahús og fyrirtæki.

Hóp blogg 2. árs heilbrigðisverkfræðinema: biomad.wordpress.com
Hóp blogg 3. árs heilbrigðisverkfræðinema: blog.central.is/hbv2005 

Hugbúnaðarverkfræði

Hugbúnaðarverkfræði veitir góðan almennan grunn í tölvunarfræði, stærðfræði og verkfræði, jafnframt því að leggja áherslu á formlegar aðferðir við gerð stærri hugbúnaðarkerfa, þ.m.t. verkefna- og gæðastjórnun. Námið veitir því sterkan bakgrunn fyrir þá sem koma til með að byggja og viðhalda stórum og tæknilega flóknum hugbúnaðarkerfum, sér í lagi þar sem gerðar eru miklar kröfur um áreiðanleika.

Hátækniverkfræði

Áherslan í hátækniverkfræðináminu í HR er á sjálfvirkni, stýringar, vélmenni, framleiðslutækni, orkutækni og hönnun. Markmiðið er að tvinna saman rafmagns-, tölvu- og véltækni þannig að hátækniverkfræðingar hafi góða yfirsýn yfir hönnun og rekstur flókinnna véla og kerfa sem byggja á þessum tæknigreinum. Í framhaldsnámi sérhæfa iðnaðarverkfræðingar sig í hátæknihönnun eða fjöltækni (e. mechatronics), orkutækni eða framleiðslutækni.

Hóp blogg 2. árs hátækniverkfræðinema: transformer.bloggar.is
Hóp blogg 3. árs hátækniverkfræðinema: blog.central.is/iv2005

Rekstrarverkfræði

Rekstrarverkfræði er þverfaglegt svið þar sem fengist er við rekstur og stjórnun í víðtækri merkingu. Beitt er verkfræðilegum aðferðum, á borð við aðgerðagreiningu og tölfræði, til greiningar og útfærslu í rekstri og stjórnun. Lögð er áhersla á nýsköpun og nýsköpunarhæfni, alþjóðaviðskipti og nýjustu stjórnunaraðferðir. Auk þess er fengist við fjármál og viðskiptalögfræði.

Markmið rekstrarverkfræðinámsins í tækni- og verkfræðideild er að mennta framtíðarstjórnendur og leiðtoga sem geta tekist á við spennandi nýsköpunarverkefni, alþjóðleg viðskipti og uppbyggingu nýrra tækifæra í atvinnulífinu.

Hóp blogg 3. árs rekstrarverkfræðinema: blog.central.is/rekstrarv

* Texti frá ru.is